Ginmandu ni Presidente Rodrigo Duterte ang house-to-house anti-COVID-19 vaccination program ilabi na sa mga nabukid nga bahin sang pungsod bangud sa gina-ekspektar nga expiration sang minilyon ka mga bakuna sa sunod nga mga binulan.
Suno kay Duterte, ang mga bakuna ang handa na nga ipangtublok sa mga Pilipino nga willing nga magpabakuna.
Ginpaandaman man sang Presidente ang mga myembro sang New People’s Army (NPA) nga indi pagpahugon ukon ibutang sa peligro ang kabuhi sang mga healthcare workers kun magpatigayon ang mga ini sang house-to-house vaccination.
Ginpakamalaut naman ni Senate Minority Leader Franklin Drilon ang gobyerno sa mga mauyang nga bakuna.
Suno kay Drilon, ang pagbakal sang COVID-19 vaccines ang isa sa mga rason sa pagtaas sang utang sang Pilipinas nga subong nagdangat na sa P12 trillion as of February 2022.
Sa P500 per dose rate, mahimo nga ma-uyang sang Pilipinas ang P13.5 billion kun mag-expire ang 27 million ka mga bakuna.
Suno naman kay Health Secretary Francisco Duque III, yara sa 25 tubtob 27 ka million sang mga bakuna ang ma-expire sa Hulyo.
Yara sa 1.5% suno sa iya ang wastage rate sang bakuna sa pungsod.
