Nagalaum ang Public Safety and Transportation Management Office (PSTMO) nga maistoryahan sa konseho ang bag-o nga mga pagsulundan agud nga mahatagan sang dugang nga safety ang mga siklista sa syudad sang Iloilo.
Ang Iloilo City ang ginpasidunggan sang back-to-back Gold in Mobility Awards kag Bike Lane Awards sang nagligad nga tuig kag kilala man bilang bike-friendly city and Bike Capital of the Philippines.
Sa interview sang Bombo Radyo kay Jeck Conlu, head sang PSTMO, iya ginpahayag nga apisar sini nga mga pagkilala, pila gihapon sa mga siklista ang nagalapas sa mga pagsulundan kun yara na sa dalan.
May ginapangsita ang PSTMO suno kay Conlu bangud may mga naga-bike nga nagalapaw sa bike lane ukon nagapatunga gid sa dalan ilabi na kun kagab-ihon.
May yara man sang siklista nga nagasaka pa sa flyover.
Sa Fort San Pedro sa Iloilo City Proper, may reported man nga nagapa-lumba sang bike kun gab-i.
Pareho ini nga delikado para sa mga nagadala sang motor vehicles kag sa siklista suno kay Conlu. Ginpasigurado sini nga nagapaninguha man ang PSTMO agud nga ma-edukar ang cyclists sa syudad.
Nagapanawagan may ini sa may ihibalo kaangot sa mga palumba-lumba ukon sa salawayon nga mga nagadala sang bike nga i-report ini sa otoridad. ##
