ILOILO CITY – Nagpanawagan si Senate President Juan Miguel Zubiri sa mga opisyal sang Sugar Regulatory Administration (SRA) nga may kaangtanan sa pagpirma sang illegal importation order sang 300,000 metric tons sang kalamay nga mag-resign na.
Ini ang ginpahayag ni Zubiri kasunod sang pag-anunsiyo ni Press Secretary Trixie Cruz Angeles nga nag-resign na si Undersecretary Leocadio Sebastian sa iya position bilang undersecretary for operations kag chief of staff to the Secretary of Agriculture.
Nahibaluan nga ginpahayag ni Cruz-Angeles nga nagpangayo sang pasaylo si Sebastian sa Chief Executive bangud sang pagpirma sang Sugar Order No. 4 apisar nga wala sang aprroval kay Marcos nga amo ang nagaserbe nga DA Secretary kag chairman sang Sugar Regulatory Board.
Suno kay Zubiri, kung may yara pa sang delicadeza ang mga katapo sang SRA nga may kahilabtanan sa iligal nga Sugar Order No. 4, dapat na sila nga mag-resign.
Ginpahayag man niya nga dapat sila nga kasuhan matapos nga ginlapas nila ang order sang presidente.
Maga-request man siya sang nagaka-igo nga imbestigasyon sa pagtuyo sang importation.
Una na nga ginpahayag ni Agriculture Undersecretary Kristine Evangelista nga kinahanglan sang Pilipinas nga mag-import sang 300,000 metric tons sang kalamay agud nga mag-stabilize ang presyo sini sa merkado.
Apang, ini ang ginbasura ni Marcos.
Ginpahayag man ni Cruz-Angeles nga nagapadayon man ang imbestigasyon sa “unauthorized” nga pagpirma sang dokumento nga nagamandu sang importation sang 300, 000 metric tons sang kalamay magluwas pa sa una na nga gin-import sang bulan sang Mayo subong nga tuig.
