ILOILO CITY – Ginpangsakit sang Taliban fighters ang mga babayi nga nagprotesta samtang nga naga-rally sa Afghan capital pila ka adlaw antes ang una nga anibersaryo sang pagbalik sang Islamists sa pagpamuno sa pungsod.
Humalin sang nakontrol sang Taliban ang Afghanistan sang Agosto 15 sang nagligad nga tuig, ginbali ang benepisyo sa mga kababainhan sa tion sang duha ka tuig nga US intervention sang pungsod.
Ginabanta 40 ka mga kababainhan ang nagmartsa sa atubang sang education ministry building sa Kabul antes sila ginpangtabog sang fighters pinaagi sa pagpalupok sang armas sa kahawaan.
Ang ginasinggit sang mga kababainhan amo ang pagkaon, trabaho kag kahilwayan.
May mga kababainhan nga nagpanago sa malapit nga mga shops ang ginpanglagas kag ginpangsakit sang Taliban fighters gamit ang ila rifle.
Ang mga demonstrators ang nagdala sang banner nga may nakasulat nga “August 15 is a black day” kag nagdemanda sang kinamatarong sa pagtrabaho kag political participation.
Magluwas nga ginpangtabog, ginpang gisi pa ang mga banners kag ginpangkuha ang mga mobile phones.
May mga journalists naman nga nag-cover nga ginpangsakit man sang Taliban fighters.
Nahibaluan nga sang nagsugod ang pag-take over sang Taliban, madamo sang restriction nga ginpatuman ilabi na sa mga babayi.
Linibo ka mga babayi ang ginpagwa sa mga secondary schools kag wala na ginpahanugutan nga magbalik sa madamo nga trabaho sa gobyerno.
Ginadumilian man sila nga mag-travel nga naga-isahanon sa mga malawig nga byahe kag makabisita lamang sila sa public gardens kag parks sa capital sa tion sang adlaw kag separado sa mga kalalakinhan.
Sang Mayo, ginmandu sang head sang Taliban nga si Hibatullah Akhundzada nga tabunan sang mga kababainhan ang ila lawas sa publiko lakip na ang ila mga nawong nga daw kaangay sang burqa.
