ILOILO CITY – Gin-akusaran ni Russian President Vladimir Putin ang Estados Unidos nga amo ang nagapadugay sang tensyon sa Ukraine kag nagatuga sang kumplikto sa kalibutan lakip na diri ang pagbisita ni US House Speaker Nancy Pelosi sa Taiwan.
Suno kay Putin, ang sitwasyon sa Ukraine ang nagapakita gid lamang nga ginapadugay sang US ang tensyon.
Magluwas sina, ang US man ang nagatuga sang tensyon sa Asya, Africa kag Latin America.
Ang pagpadulong sang mga opisyal sang US sa Taiwan ang indi lamang trip sang isa ka indibidwal nga iresponsable nga pulitiko suno kay Putin kundi may tinutuyo kag plano nga i-destabilize kag gamuhon ang sitwasyon sa rehiyon kag sa bilog nga kalibutan.
Suno pa sa iya, ang pagbisita ang nagapakita sang indi pagrespeto sa soberanya sang iban nga pungsod kag sang sang kaugalingon nga international obligations.
Ginalantaw ini sang Russia bilang isa ka “carefully planned provocation”.
Sa sulod na sang halos anum ka bulan, ang pag-atake sang Moscow sa Ukraine ang nagpatay na sang linibo ka tawo, nagpalayas sang minilyon ka mga tawo kag nagresulta sa kakulang sang pagkaon sa bilog nga kalibutan.
Sa ginpatigayon nga security conference, ginpahayag ni Russia’s Defence Minister Sergei Shoigu nga wala sang plano ang Moscow nga maggamit sang nuclear weapons sa Ukraine.
Suno sa iya, nagikan sa punto de bista sang military, indi na kinahanglan pa nga maggamit sang nuclear weapon sa Ukraine agud nga malab-ot ang goal.
Nahibaluan nga ang relasyon sa tunga sang Russia kag US ang indi na maayo humalin sang naglunsyar sang military intervention ang Moscow sa pro-Western Ukraine.
