ILOILO CITY – Ginbasura ni Pope Francis ang formal church investigation sa sexual assault claim batuk kay Canadian Cardinal Marc Ouellet matapos ang ginpatigayon nga preliminary inquiries kun sa diin, nakita nga wala sang basehan.
Si Ouellet nga ginkonsiderar man sadto nga mabaskog nga kandidato nga mangin Santo Papa ang ginpasakaan sang kaso lakip na ang masobra sa 80 ka myembro sang clergy sa archdiocese of Quebec.
Ang 78 anyos nga cardinal ang gin-akusaran nga nag-abuso sa isa ka babayi nga intern nga gintumod gid lamang nga “F” sang 2008 tubtob 2010 sang siya ang arsobispo pa sang Quebec.
Suno sa Vatican spokesman nga si Matteo Bruni, nagmandu si Pope Francis nga magpatigayon sang “preliminary investigation” kag nakita nga wala sang elements agud nga mag-initiate sang trial.
Ginbalikan sang pontiff ang nagpasaka sang kaso nga amo si Father Jacques Servais kag ginhambalan nga wala sang ground agud nga magbukas sang formal investigation.
Si Ouellet ang prefect of the Congregation for Bishops nga isa sa pinaka-importante nga position sa Curia nga gobyerno sang Vatican.
