Nagpaguwa sang bag-o nga paandam si Russian President Vladimir Putin nga malala pa ang maabtan sang sin-o man nga magapadayon sa paghimo sang “terroristic attack” sa teritoryo sang Russia.
Ang statement ni Putin ang kasunod man sang iya mandu nga paulanan sang cruise missiles kag maglunsar sang makamamatay nga pagpang-atake sa mga syudad sa Ukraine kahapon, Oktubre 10.
Ini ang ginatawag “largest airstrikes” halin sang nag-umpisa ang Russian invasion sa Ukraine.
Ginpangguba man sang missiles ang energy facilities, military command, kag communications facilities sa Lviv sa west padulong sa Kharkiv sa northeast.
Suno sa state emergency services, 14 ka tawo ang patay sa amo nga sunod-sunod nga Russian missile attacks.
Ini ang ginapahayag balos ni Putin sa paghalit sa Kerch Strait bridge ukon ang taytay nga amo ang naga-angot sa gin-annex nga Crimean Peninsula sa Russia sang nagligad nga weekend. Ang amo nga taytay amo ang longest bridge sa Europa nga gintukod sang Russia sang nasakop na sini ang Crimea Peninsula sang 2014 nga iya anay sang Ukraine.
Gin-selebrar sang Ukraine ang pagsigabong sa amo nga taytay apang wala man ini opisyal nga nag-ako nga sila ang responsable sa natabo.
Bangud sa balos sang Russia, suno sa prime minister ni Ukrainian President Volodymyr Zelenskiy, 11 ka major infrastructure targets ang naigu sa walo ka mga rehiyon nga rason sang pagkautod sang kuryente. ##
