Wala gintuman ni Russian President Vladimir Putin ang promisa sini sang nagligad nga adlaw nga indi na kinahanglan ang massive strikes sa Ukraine.
Ginabanta walo ka tawo ang patay sa panibag-o ang pagpang-atake sang Russia sa mga syudad sa Ukraine sang Lunes sang aga gamit ang halos 30 ka kamikaze drones nga ginapatihan nga human sa Iran.
Sa walo nga reported nga napatay, apat ang nagikan sa capital nga Kyiv lakip na ang isa ka nagabusong nga babayi, samtang apat man ang patay sa Sumy region.
May videos man nga nagapakita sang Shahed-136 drones sang Iran nga gin-rebrand sang Russia bilang Geran-2 nga amo ang naglinupad sa Kriv, nagpasigabong, kag nagpwersa sa mga tawo nga magpalalagyo.
Lima ka asud-asud nga pagsigabong ang natabo sa Kyiv nga naguba sa kritikal nga mga imprastraktura kag nag-utod sang suplay sang kuryente.
Ginapatihan nga ginagamit sang Russia ang Shahed-136 drones nga gina-suplay sang Iran.
Ginhatagan ini sang kamikaze description bangud sarang ini nga maka-operate sa kalayuon nga 1,000 km (620 miles) kag indi kaangay sang iban nga drones nga nagabalik sa base kun ma-launch na sini ang missile, ang “kamikaze” ukon “suicide” drones ang nagakaguba man sa mismo pag-atake sini.
Kaangay sa cruise missiles, maka-atake sini bisan kilometros pa ang kalayuon, apang mas barato ang “kamikaze” apang ginatawag man nga precise alternative.
Ginapatihan sang Ukraine nga nakabaton ang Russia sang 2,400 drones halin sa Iran.
Wala sang kumpirmasyon nagikan sa Iran kun gina-suplayan matuod sini sang drones ang Russia.
Una na nga nagpaandam ang Estados Unidos nga manabat kag silutan ang sin-o man nga tawo, pungsod, ukon organisasyon nga nagasuporta sa Russia sa pag-atake sini sa Ukraine.
Kun matandaan, sang nagligad lang nga semana, aga man sang nagpalupad ang Russia sang missiles sa Ukraine kag nagpatay sang 19 ka mga tawo. ##
