Dismayado ang minority bloc matapos nga ginbalik man sang bicameral conference committee ang kontrobersyal nga confidential and intelligence funds nga gin-realign na kuntani sa budget deliberations sa Senado.
Kahapon sang gin-ratify sang Kongreso ang bicameral conference committee report sa P5.268-trillion national budget para sa 2023. Buot silingon sini, pirma na lang ni President Bongbong Marcos ang kulang.
Na-restore diri ang pila ka controversial provisions kaangay sang P150-million nga confidential fund para sa Department of Education nga ginapamunuan ni Vice President kag Education Secretary Sara Duterte-Carpio kag ang P10-billion nga pondo para sa anti-communist task force.
Para kay Senator Risa Hontiveros, napaslawan ang Kamara kag Senado nga panindugan ang ila nga independence gikan sa administrasyon nanday President Ferdinand Marcos Jr. kag Duterte-Carpio.
Nasubuan man ini nga ginkakas ang probisyon nga naga-require sang congressional reporting sa utilization plan kag disbursement sang confidential fund. Buot silingon, kun wala ang amo nga probisyon, apisar may yara sang gintukod nga Select Oversight Committee on Confidential and Intelligence Funds, mabudlayan ang Kongreso suno kay Hontiveros kun paano mapatuman ang checks and balances sa gobyerno kag kun paano masigurado nga may transparency kag wala sang kurapsyon.
Suno naman kay Senate Minority Leader Aquilino “Koko” Pimentel III, dismayado man siya sa desisyon sang bicameral conference committee apang kuhaon pa sini ang kumpleto nga detalye sa report.
