ILOILO CITY – Indi prayoridad sang Marcos administration officials ang ginaduso nga Maharlika Wealth Fund.
Suno kay Senate Majority Leader Joel Villanueva, wala ini gin-raise sang mga opisyal sa ginpatigayon nga pinakauna nga Legislative Executive Development Advisory Council meeting sang Oktubre.
Ini ang nangin sabat ni Villanueva sang ginpamangkot kun bala, ginaduso gid ini ni President Ferdinand “Bongbong” Marcos, Jr.
Ang pagsinapol ang ginpatigayon sang Oktubre 10 kun sa diin, ginhambalan nanday Marcos kag sang mga mamalidha nagikan sa duha ka mga chambers ang at least 26 ka mga bills nga ginkabig nga prayoridad.
Nagpahayag naman sang pagsuporta si Villanueva sa ideya nga paghimo sang isa ka sovereign wealth fund.
Apang suno sa iya, ang pondo nga i-invest ang indi dapat nga maghalin sa pension sang Government Service Insurance System kag Social Security System.
Ginsuhestiyon sang senador nga kuhaon nalang ang pondo sa mga non-renewable industries kaangay sang mining.
Una na nga ginpahayag ni Albay Representative Joey Salceda nga si Marcos mismo ang may gusto nga magpasar sang layi nga naga-establish sang Maharlika fund.
Ginpahayag man ni Finance Secretary Benjamin Diokno nga ang pagtukod sang Maharlika Wealth Fund ang ginpahanugutan mismo sang presidente.
Sa ginpagwa naman nga statement ni minority Senator Risa Hontiveros, ang ginaduso nga sovereign wealth fund counterproductive sa economic growth sang pungsod.
Ang House Bill 6398 ang nagatuyo nga ma-maximize ang investible state assets para sa pagpasanyog sang social services.
Sang Nobyembre 29, ang amo nga hagna ang pasado na sa House committee on banks and financial intermediaries isa ka adlaw matapos ini nga gin-file.
Ang mga authors sini amo sanday Speaker Martin Romualdez nga pakaisa sang presidente; presidential son nga si senior Deputy Majority Leader Ferdinand Alexander A. Marcos; House Majority Leader Manuel Jose “Mannix” M. Dalipe nga anak sang pilot ni former President Ferdinand E. Marcos, Sr.; Tingog party-list Representative Yedda Marie K. Romualdez nga asawa ni Speaker Romualdez; Jude A. Acidre sang amo man nga party-list kag Marikina City Rep. Stella Luz A. Quimbo nga kaalyado man sang presidente.
