Dala ni President Ferdinand “Bongbong” Marcos Jr. ang P9.8-billion investment pledge halin sa European firms sang nagpauli siya halin sa pagtambong sa Association of Southeast Asian Nations-European Union (ASEAN-EU) summits sa Brussels, Belgium.
Sa iya arrival speech, gintawag ni Marcos nga produktibo ang iya pagkadto sa amo nga pungsod kag pagpakig-istorya sa nagkalain-lain nga firms apisar nga natrangkaso siya sang nag-abot sa amo nga pungsod.
Suno pa kay Marcos, tanan nga business leaders nga iya naistorya sa sidelines sang summit ang nagkomiter nga mangin kabahin sang development kag economic growth sang Pilipinas partikular na sa renewable energy, infrastructure, climate change, kag food security initiatives.
Sa amo nga byahe, nakapatigayon si Marcos sang bilateral meetings sa European Council, European Commission, Estonia, Sweden, Czech Republic, the Netherlands, kag sa Spain.
Sa iya naman nga meeting kay King Philippe sang Belgium, ginpahayag sini nga gin-imbitar niya ang hari nga magbisita sa Pilipinas.
Ang pagbyahe ni Marcos sa Belgium amo ang iya una nga pagbisita sa Europa bilang presidente sang Pilipinas.
Siya man ang nagtindog nga coordinator nga nagatiglawas sang ASEAN sa amo nga summit.
