Ginpasalig sang Senado nga busision kag tun-an sang husto ang kontrobersyal nga Maharlika Investment Fund bill kasunod sang pagpasar sang Kamara sa amo nga hagna kag kasunod sang pag-certify diri ni President Bongbong Marcos bilang “urgent”.
Suno kay Senate President Juan Miguel “Migz” Zubiri, magadepende ang kadasigon sang pagpasar sang hagna sa abilidad sang committee chairperson nga magapanguna sa Senate deliberations kag sa “quality of work” nga makit-an sa hearings.
Ang final version sang sini nga hagna ang igapasa sa Senado sa Enero 23, 2023 nga amo man ang pagbalik sang sesyon sa Kongreso.
Magaagi ang Maharlika fund bill sa first reading kag i-refer sa at least apat ka committees lakip ang Committee on Banks, Financial Institutions and Currencies bilang lead Senate panel, kag ang Committees on Government Corporations and Public Enterprises, Ways and Means, kag Finance bilang secondary panels.
Kun ma-refer na sa nagakaigu nga committees, depende na sa chairmen ang pag-schedule sang hearings para sa discussion.
Yari ang chairpersons sang ginpanglawag nga komitiba sa Senado:
* Banks, Financial Institutions and Currencies — Sen. Mark Villar
* Government Corporations and Public Enterprises — Sen. Alan Peter Cayetano
* Finance — Sen. Sonny Angara
* Ways and Means — Sen. Sherwin Gatchalian
Kun sa Kamara may anum ka mamalidha nga nagpamalabag sa amo nga hagna, may minority bloc man sa senado nga naga-kwestyon kun ngaa gin-certify gid sang presidente nga urgent ang Maharlika fund bill nga nagresulta sa gilayon nga pagpasar sa second kag third readings sa lower chamber.
Para kay Senate Minority Leader Aquilino “Koko” Pimentel III, ang certification of urgency ang magahatag sang impresyon nga dapat nga dasigon gid sang Senado ang pag-approve sa hagna.
Para naman kay opposition Sen. Risa Hontiveros, “premature” kag “misplaced priority” ang Maharlika fund bill kag naga-distract sa pungsod sa mga bagay nga dapat kuntani tutukan kaangay sang inflation, pagpasaka sang sweldo sang workers, kag paghatag ayuda sa mga tigulang, solo parents, kag sa disabled. ##
