ILOILO CITY – Nagalaum si anay Presidente Rodrigo Duterte nga mauntat na ang terorismo sa pungsod kasunod sang kamatayon sang founding chairman sang Communist Party of the Philippines nga si Jose Maria Sison.
Sa isa ka statement, ginpahayag ni Duterte ang iya condolences sa pamilya ni Sison kag nagalaum ini nga mangin malinong na ang pungsod.
Ginlaragway ni Duterte si Sison nga isa ka tawo nga kilala sa iya radical ideas nga nag-apekto sa maragtas sang Pilipinas.
Apisar nga wala nagsanto ang pananaw-an nila nga duha sa kun paano bag-uhon ang Pilipinas, nagapati si Duterte nga nangin pareho man sila sang tinutuyo nga magdihon sang maayo nga bwas damlag para sa tagsa ka mga Pilipino.
Nagpanawagan man si Duterte sa tagsa-tagsa nga magtukod sang malinong kag naga-isa nga pungsod para sa mga ulihing tubo.
Si Sison ang anay professor ni Duterte sa Lyceum University sang 1960s.
Napatay si Sison sa edad nga 83 anyos matapos ang duha ka semana nga confinement sa ospital sa the Netherlands.
Natalana pa nga ipaguwa sang Communist Party of the Philippines ang specific details kasunod sang kamatayon ni Sison.
Gintukod ni Sison ang Communist Party of the Philippines sang Dec. 26, 1968.
Nadakpan siya sang Armed Forces of the Philippines sang November 1977 sa idalom sang pagginahum ni anay Presidente Ferdinand Marcos Sr.
Napaguwa siya sang March 1986 matapos ang EDSA Revolution.
Sang 1988, nag-apply siya bilang political refugee sa the Netherlands matapos nga ginkanselar sang Philippine government ang iya nga passport samtang yara siya sa amo nga European country.
Didto na nagtinir si Joma tubtub nga ginbawian ini sang kabuhi.
