Ginpaguwa sang gobyerno ang masobra 300 ka inmates ukon ang persons deprived of liberty bilang kabahin sang tikang agud ma-decongest ang penal facilities sa idalom sang Bureau of Corrections.
Gintawag ini nga programa nga Paskong kay Saya ang Pagbabalik sa Pamilya Program.
361 ka inmates ang gin-release kahapon kadungan sang seremonya sa New Bilibid Prison sa Muntinlupa City.
Yara sanday Justice Secretary Jesus Crispin Remulla kag Public Attorneys Office Chief Persida Rueda-Acosta.
Si Remulla amo ang may yara sang administrative supervision sa Bureau of Corrections samtang ang Public Attorney’s Office naman ang kabahin sang team nga naga-evaluate sang rekord sang inmates agud ma-determine kun mahimo na sila makaguwa sa presuhan.
Lakip sa mga ginpaguwa kahapon amo ang inmates nga acquitted na sa mga kaso nga gin-file sa ila, mga preso nga ginhatagan sang probations, mga ginpahanugutan nga magpyansa, mga nahatagan sang parole, mga returnees, kag ang mga inmate nga may expired na nga maximum nga sentensya.
33 naman ang ginpaguwa bangud sa katigulangon.
Sang Septyembre, may ginrelease man nga 371 ka mga inmates kadungan sang birthday celebration ni President Ferdinand Bongbong Marcos Jr.
Sang October, may 357 ka mga preso nga ginpagwa kag ginsundan sang 234 sang Nobyembre.
Suno kay Remulla, 700-800 ka inmates ang target nga paguwaon agud magligwa ang penitentiaries nga ginadumalahan sang Bureau of Corrections.
Sa Bilibid pa lang, yara na ang decongestion rate sa 300 percent.
