ILOILO CITY- Ginkalipay ni Iloilo City Councilor Rex Sarabia ang desisyon ni Mayor Jerry Treñas nga indi na magpatuman sang signal jamming sa masunod nga Dinagyang Festival.
Ini kasunod sang pag-ulan sang madamo nga reklamo may kaangtanan sa signal shutdown kun sa diin, sa baylo nga ang mga pili nga areas lang sa syudad ang madulaan sang signal, nasakop gid ang bilog nga syudad kag mangin ang kaiping nga kabanwahanan kag probinsiya sang Guimaras.
Sa interview sang Bombo Radyo kay Councilor Sarabia, iya ginpahayag nga kun huna-hunaon, mas dako ang perwisyo nga matuga sang signal jamming kun ikumpara sa bentaha nga dala sini sa aspeto sang seguridad.
Suno pa kay Sarabia, nalipay man ini bangud mangin ang kaupdanan niya sa konseho ang nagakumporme man sa plano sang alkalde.
Matandaan nga si Sarabia lamang ang isahanon nga nagpamatok sa signal jamming sang ginbotohan ini sa konseho.
