ILOILO CITY – Padayon pa nga gina-verify sang mga overseas Filipino worker sa Turkey ang impormasyon nga may isa ka Pinoy nga napatay kasunod sang pagtay-og sang 7.8 magnitude nga linog.
Suno kay Bombo Celyn Marie Tiu, presidente sang Kabalikat Civicom sa Turkey, isa ka Ilonggo kag yara subong sa Istanbul, ginapahayag nga napatay ang Pinoy kaupod sa iya amo.
Wala pa sang dugang nga detalye nga ginakaptan ang grupo magluwas lamang sa pangalan sini.
Magluwas sa ginapahayag nga napatay, masobra naman sa 50 ka mga Filipino migrant workers ang apektado sang linog sa Turkey.
Ang mga ini ang yara na subong sa shelter sang Turkish government.
Naga-reklamo naman ang mga ini bangud nga wala na sila sang pagkaon bangud nga wala naman sang may mabaklan.
Nagabuligay naman ang mga Filipino sa amo nga pungsod agud nga mapadal-an sang kwarta ang mga apektado.
Samtang, padayon pa nga nagasaka ang numero sang mga nagkalamatay sa linog.
Sa pinakauli nga data, nagdangat na sa 7, 200 ang mga nagkalamatay kun sa diin, 5,400 ang na-record sa Turkey samtang 1,800 naman sa Syria.
Nagdeklarar na sang state of emergency ang presidente sang Turkey sa pulo ka mga probinsya bangud sang epekto sang linog.
Suno sa United Nations Children’s Fund, posible nga linibo na ka mga kabataan ang nagkalamatay.
Suno naman kay Bombo Celyn Marie Tiu, presidente sang Kabalikat Civicom sa Turkey, ang malain nga tyempo ang naga-apekto sa ginapatigayon nga search and rescue operation.
Posible suno kay Tiu nga ang iban ang nagkalamatay indi bangud sang linog kundi sang tuman nga katugnaw.
Sa subong, nagpasalig na sang bulig ang mga pungsod kaangay sang Pilipinas, Estados Unidos, China, United Kingdom, Russia, India, Germany, Ukraine, Greece, Israel, Qatar, Iran, Algeria, Tunisia, Japan, ang United Nations, ang European Union kag madamo pa nga mga pungsod.
