ILOILO CITY- Ginakabig sang progresibo nga grupo nga Bagong Alyansang Makabayan (Bayan)-Panay nga inisyal nga kadalag-an ang pagpalawig sang prangkisa sang traditional nga mga jeep tubtob sa Disyembre 31,2023 sa baylo nga sa Hunyo 30.
Sa interview sang Bombo Radyo kay Bagong Alyansang Makabayan (Bayan)-Panay secretary general Elmer Forro, iya ginpahayag nga sa pihak sini, indi sa gihapon sila kumporme sa modernization program sang gobyerno.
Suno kay Forro, ginasinggitan nila sa gihapon nga ipaiway ukon indi gani, i-amend ang amo nga programa nga nagapabudlay sa mga ordinaryo nga mga operator kag driver.
Pahayag ni Forro, wala nagakabagay ang modernization program sa ikasarang sang mga operators bangud nga ang isa ka unit sang modernized jeep ang yara sa P2.2 million.
Dugang niya, sa baylo kuntani nga i-require ang pagbakal sang bag-o nga unit, mahimo man nga ang makina na lamang ang i-import kag indi ang bilog nga jeep.
