ILOILO CITY – Ginpahayag sang North Korea nga 800,000 sang mga citizens sini ang nagboluntaryo nga mag-upod ukon maga-reenlist sa military sang pungsod agud nga mabatuan ang Estados Unidos.
Sang Huwebes, gin-anunsiyo sang North Korea nga naglunsyar ini sang Hwasong-17 intercontinental ballistic missile bilang balos sa nagapadayon nga United States-South Korea military drills.
Ini ang ginlunsyar sa dagat sa tunga sang Korean peninsula kag Japan, pila ka oras antes ang paglupad sang presidente sang South Korea sa Tokyo para sa isa ka summit nga nagsentro sa mga pamaagi agud nga mabatuan ang nuclear-armed North.
Ang ballistic missiles sang Pyongyang ang gin-ban sa idalom sang United Nations Security Council resolutions kag ang pinakaulihi nga paglunsyar ang ginkondenar sang gobyerno sang Seoul, Washington, kag Tokyo.
Sang Lunes, ang South Korean kag American forces ang nagsugod sang 11 ka adlaw nga joint drills nga gintawag nga “Freedom Shield 23.”
Bangud sini, gin-akusaran ni Kim Jong Un ang duha ka pungsod nga nagapalala sang tension pinaagi sa military drills.
