ILOILO CITY- Ginapakamaayo sang transport cooperative sa Iloilo City nga padayunon na lang ang pag-acquire sang mondernized jeepney nga kabahin sang modernization program sang gobyerno.
Ini sa tunga sang panawagan sang pila ka mga drivers kag operators nga tugutan sila nga i-upgrade na lang ang ila traditional jeepney sa baylo nga magbakal sang baag-o nga modernized jeepney unit.
Sa interview sang Bombo Radyo kay Rizal Alido, board secretary sang Iloilo City Alliance of Operators and Drivers Transport Cooperative, iya ginpahayag nga apisar nga wala ini nagapamatok sa amo nga pangabay sang iban nga jeepney operators, apang madugay ang proseso sang upgrading.
Suno kay Alido, indi man mahapos ang proseso sini bangud kinahanglan man sini nga makapasar sa standards ilabi na sa gamiton nga makina sa rason nga indi man mahimo maggamit sang secondhand ukon surplus.
Dugang niya, sa subong, apisar mabudlay sa iban nga myembro sang transport sector ng modernization program apang nagapati si Alido nga may tion pa tubtob sa Disyembre 31 ang mga traditional jeepney operators nga magsulod sa kooperatiba ukon korporasyon agud indi na ang mga ini mabudlayan sa pagpa-upgrade sang ila mga jeep.
