ILOILO CITY- Nagpadala na sang team ang Iloilo City Government agud magpadulong sa isla sang Boracay agud madala pabalik sa syudad ang dalagita nga nagsaot sang halos hublas sa MO2 Ice kag nakuhaan pa ini sang video.
Sa interview sang Bombo Radyo kay Mr. Nestor Canong, pinuno sang Task Force on Morals and Values Formation, iya ginpahayag nga nagpakig-angot na sila sa mga social workers sa Aklan agud masunod ang protocol sa pagsugat sa dalagita.
Suno kay Canong, sa tion nga mapamatud-an nga menor de edad gid man ang babaye, kabigon nga rescue kag indi apprehension ang matabo.
Dugang ni Canong, magahatag sang nagakaigo nga assistance kaangay sang psycho -social intervention ang syudad bangud nga ginakabig niya nga indi normal ang paminatasan sang amo nga menor de edad.
Samtang ginkumpirma naman ni Punong Brgy. John Eric David sang Brgy. Veterans Village, Iloilo City Proper nga residente gid man sang ila lugar ang dalagita.
