ILOILO CITY- Pabor ang chairman sang Committee on Public Order and Security sa Sangguniang Panlalawigan sa plano ni Iloilo Governor Arthur Defensor Jr. nga ipaidalom sa drug test ang mga empleyado sang Iloilo Provincial Government.
Sa interview sang Bombo Radyo kay Iloilo 2nd District Board Member June Mondejar, iya ginpahayag nga indi lang ang mga newly hired nga empleyado ang ipaidalom sa drug testing kundi mangin ang mga empleyado nga madugay na nga nagatrabaho agud masiguro nga drug-free ang kapitolyo.
Suno kay Mondejar, kinahanglan nga mangin modelo sang mga pumuluyo ang mga empleyado sang gobyerno.
Dugang niya, mangin random lamang ang drug testing kag indi man masikop ang tanan bangud nga nagakinahanglan ini sang dako nga pondo.
Matandaan nga isa ka empleyado sang kapitolyo nga si Jojerick Bisnar, Administrative Aide IV sang Provincial Budget Office ang nadakpan sa drug buy-bust operation sang nagligad nga bulan.
Bangud sa insidente, nagpaguwa sang Executive Order No. 243 si Governor Defensor nga nagatukod sang fact-finding committee agud ma-imbestigaran si Bisnar.
