ILOILO CITY- Pasado na sa first reading sang Iloilo City Council ang proposed ordinance nga nagamando sa pag-issue sang citation tickets sa baylo nga pagkumpiskar sang driver’s license.
Ini ang pag- amyendar sang section 1 kag 3 sang ordinance No. 338 nga naga- authorize sa mg pulis kag traffic aides nga magkumpiskar sang lisensya sang mga traffic violators.
Sa interview sang Bombo Radyo kay Councilor Sedfrey Cabaluna, chairman sang Committee on Transportation sa konseho, iya ginpahayag nga ginkakas nila sa section 1 ang nagapahanugot sa police kag traffic enforcer sang gahum na maka- confiscate.
Samtang sa section 3, gin-islan man sa 72 ka oras sa baylo nga 48 oras ang tion nga ihatag sa mga violators nga mabayaran ang ila ticket sa City Treasurer’s Office kag kun mapaslawan, pasakaan ang mga ini sang kaso sa municipal trial court.
Suno kay Councilor Cabaluna, nagagwa nga mas mahapos ang ini nga pagsulundan pananglitan matigayon.
Dugang pa sang konsehal, pamaagi man ini nga pagsulundan nga mas mangin hugot sa traffic violators bangud mahimo nga maapektuhan ang paggawad nila sang mga clearances kun may mga pending sila nga kaso kun indi makabayad sa penalidad sang ila violation.
