ILOILO CITY- Nangin dinapit nga bisita si Philippine National Police Chief PGen Benjamin Acorda Jr. sa selebrasyon sang 122nd Police Service Anniversary sang Police Regional Office 6.
Tema sang selebrasyon amo ang “Nagkakaisang Pulisya at Pamayanan Tungo sa Mapayapa at Maunlad na Bansa.”
Sa iya mensahe bilang guest of honor sa selebrasyon, ginpahangop ni Acorda ang iya 5-Focused Agenda nga nagalakip sang masunod:una ang Personal Morale and Welfare; ikaduha ang Community Engagement; ikatatlo ang Integrity Enhancement; ikaapat ang ICT Development; kag ikalima ang Honest Law Enforcement Operation.
Suno kay Acorda, sa idalom sang iya pagpamuno, handom gid niya nga mabalik liwat ang pagsalig sang publiko sa amo nga organisasyon.
Samtang, sa amo man nga kahiwatan, ginpasidunggan ang mga police offices kag mga personnel nga may dalayawon nga accomplishments angot sa kampanya kontra sa tanan nga krimen.
