ILOILO CITY- Ginasinggitan sang pila ka mga student organizations sang West Visayas State University nga sa baylo nga gamiton sa mandatory Reserve Officers Training Corps, mas maayo nga sa edukasyon nalang ipain ang budget sang gobyerno.
Kadungan ini sang ginapatigayon nga Reserve Officers Training Corps Games 2023 Visayas Leg kun sa diin ang amo nga unibersidad ang host para sa mga delegates.
Sa interview sang Bombo Radyo kay Jiezel Maglalang,Chairperson sang League of Filipino Students, iya ginpahayag nga nagapamatok gid sila sa Mandatory Reserve Officer Training Corps bangud magadugang lang ini sa galastuhan sang mga ginikanan.
Suno kay Maglalang, ang malain pa amo nga may proposed budget cut ang gobyerno sa educational sector.
Nagpaathag naman ini nga ang ila hublag-protesta nga ginhiwat sa sulod sang unibersidad ang may katuyuan gid lamang nga magpanawagan kag kabahin ini sang ila nga tradisyon sa una nga adlaw sang pagbukas sang klase ukon ang ginatawag nila nga “Isko, Iska salubong.”
Ginakwestiyon naman nila ang presensya sang armado nga kapulisan sa gwa sang unibersidad kadungan sang ila pagpatigayon sang hublag.
