ILOILO CITY- Gin-athag ni KABATAAN Partylist Representative Raoul Manuel nga wala nalakip sa approved House Bill 8980 ukon ang ginduso nga P5.768 trillion budget para sa 2024 ang pag-realign sang confidential kag intelligence funds sang Office of the Vice President kag Department of Education.
Sa interview sang Bombo Radyo kay Rep. Manuel, iya ginpahayag nga lunsay promisa lang ang ginpangbuy-an sang mga lideres sang Kamara nga iga-realign ang confidential and intelligence funds sang nagkalain-lain nga civilian agencies pakadto sa security forces nga amo ang magapangapin sa West Philippine Sea.
Suno sa Ilonggo solon, wala sang bisan isa ka amendment sa gin-aprubahan nga budget gani ara sa gihapon ang kontrobersyal nga pondo.
Ginakwestiyon man sang mamalidha ang pag-certify sa 2024 national budget bilang urgent bangud wala man sang kalamidad ukon emerhensya nga mangin basehan kuntani kag wala man sang dapat dalian bangud nagahingapos palang ang 3rd quarter sang tuig.
Una na gin-anunsiyo ni House Committee on Appropriations chairperson Elizaldy Co nga nagsugtanay ang mga lider sa Kamara nga iga-augment ang pondo sa National Intelligence Coordinating Agency, sa National Security Council, Philippine Coast Guard, kag sa Bureau of Fisheries and Aquatic Resources.
Kun tingubon ang confidential kag intelligence funds sa idalom sang duha ka opisina ni Duterte, nagadangat ini sa P650 million.
Sa speech naman ni House Speaker Ferdinand Martin Romualdez pagkatapos sang pag-apruba sang budget, ginpahayag sini nga sayluhon ang amo nga confidential and intelligence fund sa tunga sang kahangawa sang publiko sa sala nga paggamit sang pondo.
