Na-delay ang pagguwa sang mga Filipinos halin sa Gaza pakadto sa Egypt bangud sa pagpang-atake sa Rafah border.
Suno sa Department of Foreign Affairs (DFA), 20 kuntani ka mga Pinoy ang magahalin sa Gaza kahapon, Nobyembre 5, apang ginsaylo na lang subong nga Lunes ang schedule.
Pananglitan makadayon sa pagguwa subong nga adlaw, hatagan sila sang transport visas pag-abot sa Egypt, kag i-proseso sang Philippine Embassy sa Cairo ang ila pagbalik sa Manila. Ginalauman nga magaabot sila sa Huwebes, Nobyembre 9.
Photo: NBC News
Suno kay Foreign Affairs Undersecretary Eduardo de Vega, gin-akusaran sang Israel ang Hamas nga amo ang nag-atake sa border sa Egypt— baliskad sa alegasyon sang Hamas nga ang pwersa-militar sang Israel ang yara sa likod sang pagpang-atake sa mga salakyan nga padulong sa border.
May report man nga ang naigu sang strike amo ang ambulance sa Gaza nga amo ang nagakarga sang pilason nga mga tawo apang ginpatihan may unod man nga mga katapo sang Hamas.
Ang Rafah border amo lamang ang naga-isahanon nga alagyan paguwa sa Gaza nga wala napaidalom sa kontrol sang Israel.
Una na nga ginpahayag sang DFA nga may permit na makaguwa ang lapaw 130 ka mga Pinoy sa Gaza paagi sa Rafah border — apang sa kondisyon nga indi pagpaguwaon ang ila Palestians nga mga himata.
Bangud sa amo nga pagsulundan, una na nga ginpahayag sang otoridad nga nadulaan man sang gana ang iban nga Pinoy nga magguwa sa Strip bangud indi man nila madala ang ila mga bana ukon asawa kag iban pa nga paryente nga Palestinhon.
Una naman nga ginpaidalom sang DFA ang Gaza sa Alert Level 4 para sa ginatawag nga forced repatriation.
Base sa health authorities sa Gaza, lapaw na sa 10,000 ang nagkalamatay bangud sa giyera sang Israel batok sa Hamas.#
