ILOILO CITY – Gin-alegar sang Yemen-based Houthis nga nagpatigayon sila sang military operation batuk sa Norwegian commercial tanker nga Strinda sa ila pinakaulihi nga protesta batuk sa pagpang-atake sang Israel sa Hamas.
Suno kay Houthi military spokesperson Yehia Sarea, gin-igo nila sang rocket ang tanker bangud nga naga-deliver ini sang crude oil sa isa ka Israeli terminal kag matapos nga wala ginsapak sang crew ang tanan nila nga warnings.
Samtang, ginpahayag naman sang French defense ministry nga ang French frigate FREMM Languedoc ang naka-intercept kag nakaguba sang drone nga nagapamahog sa Strinda.
Apang ang tag-iya sang tanker nga Norway’s Mowinckel Chemical Tankers ang nagpahayag nga ang vessel ang padulong sa Italya nga may karga nga cargo sang palm oil nga gamiton sa biofuels.
Wala ini nagaplano nga mag-untat sa Israel suno sa spokesperson sang kompaniya.
Base naman sa data nagikan sa ship-tracking firm, ang Strinda ang may karga nga vegetable oil kag biofuels sa Malaysia kag padulong sa Venice.
Wala naman nakahatag sang sabat ang Houthi officials may kaangtanan sa amo nga pahayag.
Nahibaluan nga nagapang-atake sang vessels ang Houthis kag nagapalupad sang drones kag missiles sa Israel pagkatapos sang Oktubre 7 nga pagpang-atake sang Hamas.
Ang pagpang-atake sa tanker ang natabo ginabanta 60 nautical miles north sang Bab al-Mandab Strait nga naga-angut sa Red Sea kag Gulf of Aden.
