ILOILO CITY — Wala nakabaton si Iloilo City Vice Mayor Jeffrey Ganzon sang imbitasyon agud kuntani manumpa sa Partido Federal ng Pilipinas sa Manila sang tinalikdan nga Mayo 1, 2024.

Sa interview sang Bombo Radyo kay Ganzon, iya ginpahayag nga basi may importante nga mga bagay nga ginauna ang nasambit nga partido ilabi na ang mga sa ibabaw nga mga lederes, rason nga nadugayan ang pagsumpa diri sa Iloilo City.

Suno kay Ganzon, imposible nga indi pagbatunon ni President Ferdinand “Bong-bong” Marcos Jr. ang mga lederes nga naghalin sa Iloilo nga may tuyo nga magsulod sa amo nga partido.

Ginpaathag man sang natungdan nga ginarespeto sini ang schedule sang presidente nga posible nangin rason man sang delay nga pagpanumpa sa mga opisyal sang probinsya kag syudad sang Iloilo.

Nagalaum naman ang bise-alkalde nga makapanumpa sa nasambit nga partido kag nagapati nga ini yara sa special case ang Iloilo.

Kun balik-balikan, una na nga nakansela ang nakatalana kuntani nga pagpanumpa sang mga opisyal sang Iloilo sang Abri 10, 2024.