ILOILO CITY- Gina-agda sang Archdiocese of Jaro kag Mediatrix Core Group ang mga tumuluo sa pag-ugyon sa patigayunon nga Dawn Rosary Procession nga patigayunon sa Sabado, Hulyo 6, 2024.
Sa interview sang Bombo Radyo kay Mr. Ramon Zamora, Chairman sang Mediatrix Core Group, iya ginpahayag nga katuyuan sang prusisyon ang paghalad sang pangamuyo sa tunga sang ginaatubang nga problema sang Pilipinas bangud sa pagpang-harass sang China sa mga Filipino sa West Philippine Sea.
Suno kay Zamora, bangud indi man masarangan sang Pilipinas ang China kun pwersa sang militar ang istoryahan, mas gamhanan ang pangamuyo agud nga indi na maglala ang sitwasyon.
Gindugang naman ni Zamora nga isa man sa intensyon sang prusisyon amo nga pangamuyuan nga indi mapasar agud mangin layi ang divorce bill.
Suno kay Zamora, kinahanglan nga maprotektahan ang pamilya nga sarang gub-on kun mangin legal na ang diborsyo sa Pilipinas.
Ang Dawn Rosary Procession ang magasugod sa San Jose Parish Placer padulong sa Jaro Cathedral.
Ang assembly time amo ang 3:30 sa kaagahon kag magaumpisa ang prusisyon 4:30 sang kaagahon.
