Ginalantaw sang United Nations nga maglab-ot na sa 10.3 billion ang populasyon sang mga tawo sa bilog nga kalibutan sa tunga-tunga sang 2080s.
Sandig ini sa nakabutang sa report nga “World Population Prospects 2024″ kun sa diin nakasaad nga ang populasyon subong nga 8.2-billion ang magalab-ot sa nasambit na nga maximum sa masunod nga 60 ka tuig, kag maganubo naman sa 10.2 billion sa katapusan sang siglo.
“The demographic landscape has evolved greatly in recent years,” suno kay Li Junhua nga amo ang UN Under-Secretary-General for Economic and Social Affairs.
Ginpaathag sini nga ang unexpected population peak ang nag-ugat sa nagkalain-lain nga mga rason kaangay sang manubo nga lebel sang fertility sa dalagku ga mga pungsod ilabi na sa China.
Ang lower maximum suno sa natungdan ang magaabot man sang mas temprano ipanggid sa nauna na na-calculate kag ginalantaw nga ini isa ka signos samtang ginabatuan sang kalibutan ang global warming.
Nahibaluan nga 28 percent sang world’s population ang nagapuyo subong sa isa sa 63 ka pungsod ukon areas kun sa diin nag-peak na ang populasyon lakip ang China, Russia, Japan kag Germany.
Ginalantaw naman nga malapit sa 50 ka mga pungsod ang maga-upod sa sini nga grupo makaligad ang 30 ka tuig lakip ang Brazil, Iran kag Turkey.
Sa report pa sang UN, nakasaad nga magapadayon ang population growth sa masobra 120 ka mga pungsod sa 2054 (ukon masobra pa) lakip na sa India, Indonesia, Nigeria, Pakistan kag Estados Unidos sang Amerika.
