Maga-istorya si incoming Education Secretary Sonny Angara sa Civil Service Commission (CSC) para sa nagakaigu nga adjustments sa job qualifications para sa mga estudyante nga naka-graduate na sa Senior High School (SHS).
Suno kay Angara, lantawon sini kun may yara sang mga suhestyon nga kakason na ang qualification nga kinahanglan nga college graduate gid ang maga-apply para sa trabaho bangud indi man tanan nga naga-trabaho ang nagakinahanglan sang degree sa kolehiyo.
Maga-istorya man ang senador sa business groups para mabuksan ang dugang nga oportunidad nga maka-trabaho ang technical-vocation (tec-voc) graduates sang SHS.
Lakip sa sini nga business groups suno kay Angara amo ang Management Association of the Philippines, Philippine Chamber of Commerce and Industry, Federation of Filipino-Chinese Chambers of Commerce and Industry, Makati Business Club, kag iban pa.
Ginpasalig man sini nga trabahu-on sini agud nga mahatagan sang accreditation ang SHS graduates sa idalom sang tec-voc strand kag magapakig-angot man sa Technical Education And Skills Development Authority kaangot sa problema sa kakulangan sang tec-voc trainers.
Sa Hulyo 18 natalana ang turnover ceremony kun sa diin may meeting man ang undersecretaries kag assistant secretaries sang Department of Education agud maistoryahan ang mga problema sa ahensya lakip na ang isyu sa pagsugod sang Academic Year 2024-2025.
Matandaan nga Hunyo 19 sang nagpasa sang resignation si Vice President Sara Duterte bilang DepEd secretary kag sa Hulyo 19 naman ini mangin epektibo — adlaw nga magapungko man si Angara sa iya bag-o nga posisyon.
