Magapatigayon sang rally ang supporters ni anay President Rodrigo Duterte antes ang ikatatlo nga State of the Nation Address (SONA) ni President Ferdinand Marcos Jr.
Una na-report nga i-dungan ini sa mismo SONA sa Lunes, Hulyo 22, apang ginklaro ni Manila Police District spokesperson Major Philipp Ines nga himuon ini subong nga adlaw, Hulyo 20.
Suno sa pulis, nag-apply sang permit ang coalition sang Duterte supporters para sa Freedom Park. Ang ginatumod sini amo ang Liwasang Bonifacio nga freedom park kun sa diin pwede ma-conduct ang political gatherings apisar wala sang government permits.
Suno sa National Capital Regional Police Office, posible nga yara sa 5,000 ka mga tawo ang magatambong sa rally.
Sa Lunes, ginalantaw man nga may mga progresibo nga grupo kag pro-government demonstrators nga magahimo sang kaangay man nga aktibidad.
Sandig sa pinakakaulihi nga update sang otoridad, yara sa 23,000 ang iga-deploy nga police and government security elements kadungan sang SONA matapos nga nag-augment man ang 1,000 ka dugang nga mga personnel.
Una na nagpaandam ang PNP nga manabat gid ang sin-o man nga magsunog sang effigy kadungan sang rally bangud istrikto nga ginadumilian sa layi ang pagsunog sang anuman nga bagay sa dalan.
