ILOILO CITY- Nagbiya na sa iya nga puwesto ang pinuno sang US Secret Service matapos ang ginhimo nga paggisa sang mga mamalidha sa ahensiya bangud sa natabo nga assassination attempt batok kay anay US president Donald Trump kun sa diin napilasan ini.
Gin-anunsyo sang White House ang pagbiya ni US Secret Service Director Kimberly Cheatle, apang wala pa sang komento ang ahensiya tuhoy diri.
Nabutang sa krisis ang Secret Service, nga responsable sa pagbantay sa seguridad sang mga current kag past presidents sang Amerika, matapos matigayon sang suspek nga makapalupok sang pusil kag naigo sa dulunggan si Trump samtang nagapangampanya sa Butler, Pennsylvania sang July 13.
Gin-ulan sang kritisismo si Cheatle gikan sa mamalidha nga katapo sang House of Representatives Oversight Committee sang Lunes, bangud sa pagpamalibad nga sabton ang mga pamangkot tuhoy sa security plan sa amo nga insidente.
Ang mga mamalidha gikan sa Republican kag Democratic ang pareho nga nagpanawagan sa iya nga mag-resign.
Ginpamunuan ni Cheatle ang Secret Service humalin sang 2022.
Ang natabo kay Trump ang ginakabig nga “largest failure” sang Secret Service halin sang natiruhan kag napilasan ang sadto presidente nga si Ronald Reagan sang 1981.
