Nangin tayuyon ang pinakaulihi nga resupply mission sang Pilipinas sa Ayungin Shoal sa West Philippine Sea.
Suno sa National Security Council, ini ang una nga rotation and reprovisioning (RoRe) mission nga gin-conduct matapos ang provisional arrangement kun sa diin nagsugtanay ang Pilipinas kag ang China sa mga prinsipyo kag tikang nga dapat sundon agud malikawan ang mga indi paghangpanay kag miskalkulasyon sa amo nga teritoryo.
Sa separado naman nga statement, ginkumpirma sang Department of Foreign Affairs (DFA) nga ang civilian vessel nga MV Lapu-Lapu ang gin-updan sang BRP Cape Engaño sang Philippine Coast Guard samtang nagapatigayon ini sang misyon.
Ginpahayag man nga malayo ang antad sang China Coast Guard (CCG) sa mga sakayan sang Pilipinas kag wala sang risgo sang pagbungguanay.
Sunod man nga ginpanginwala sang ahensya ang nagguwa nga mga impormasyon nga ginpahibalo anay nila ang China antes ang misyon sa Ayungin.
Suno kay DFA spokesperson Teresita Daza, wala sang prior notification nga ginpadala sa Beijing — baliskad sa gin-claim sang Chinese Ministry of Foreign Affairs nga naglisensya pa sa ila ang Pilipinas antes ang resupply operations sa BRP Sierra Madre.
