Ginalantaw sang mga pulis nga posible nga daan nga hiligut-anon ang rason sa pagluthang-patay sa isa ka lalaki sa Brgy. Sambaludan, Oton, Iloilo sang nagligad nga gab-i.
Ang biktima amo si Bernardo Cabalida Jr., 35, tumandok sang Miagao apang temporaryo nga nagatinir sa Barangay Botong sa Oton.
Matandaan nga kaupod ni Cabalida ang iya menor de edad nga bata sa lalaki sang nagtabo ini sa ka-transaksyon sini nga mabakal kuntani sang butane apang sang nag-abot na malapit sa waiting shed, gintiro siya sa tiyan sang makaduha ka beses.
Maswerte naman nga nakaluwas ang bata.
Sa interview sang Bombo Radyo kay Plt. Col. Jordan Abner, hepe sang Oton Municipal Police Station, iya ginpahayag nga ginatinguhaan sang pulis nga ma-trace ang identity sang suspek paagi sa cellphone number nga gingamit sang amo nga suspek sang nagkontak ini sa biktima.
Ginalantaw man nga makabulig ang description sang bata nga bataon pa ang suspek, chubby, 5’7″ tubtub 5’8″ ang kataason kag may dala nga motorsiklo.
Ginpahayag man nga may kaso nga frustrated murder ang biktima sa Miagao sang una kag nagapadayon pa subong ang hearings sa korte.
Suno kay Abner, tatlo ka bulan pa lamang ang pamilya nanday Cabalida sa Oton bangud pagkatapos sang ginkaulamiran sini nga insidente sa Miagao sang una, nakatinir pa ini sa Negros Occidental antes nagpuyo sa Oton.
Sa interview naman sang Bombo Radyo kay Pcapt. Francis Donne Lomahan, hepe sang Miag-ao MPS, iya ginkumpirma nga ang biktima amo ang suspek sa stabbing incident sang Enero 2024.
Estable na ang kondisyon sang ginbuno sini suno kay Lomahan kag subong nagapabilin gihapon sa Miagao.
