Magaabot na sa Pilipinas subong nga adlaw, Agusto 13, ang Filipino Olympians nga nagpasakop sa Paris Olympics 2024.
Suno kay Reichel Quiñones, chief sang Presidential Protocol and Presidential Assistant on Foreign Affairs, ‘las sais karon sa gab-i ginabanta nga maghugpa sa Pilipinas ang two-time Olympic champion nga si Carlos Edriel Yulo kag iban pa nga kaupdanan.
Abi-abihon sila sang First Family sa Malacañang kag magasunod ang awarding ceremony kag dinner reception para sa ila.
Ginpahayag man sang Presidential Communications Office (PCO) nga may cash incentive para sa Olympians apang si President Ferdinand Marcos Jr. na ang maga-anunsyo kun pila ang ila batunon.
Magabaton si Yulo sang Presidential Medal of Merit samtang hatagan naman ang iban nga atleta sang presidential citations kadungan sang heroes’ welcome sa palasyo.
Sa amo nga event, gintugutan ang mga atleta nga mag-imbita sang tubtub apat ka miyembro sang ila pamilya apang indi pa sigurado suno sa opisina kun sin-o ang magakadto kay Yulo ilabi na bangud sa kontrobersiya nga nagpalibot sa ila pamilya kasunod sang iya pagdaog sang gold medal sa Olympics.
Buwas, Agusto 14, naka-schedule ang 7.7-kilometer parade bilang pagkilala sa mga atleta. Una nga gin-schedule ang parada subong nga adlaw apang ginsaylo buwas bangud gab-i na sila magaabot diri sa pungsod.
Magluwas kay Yulo nga nakabulsa sang gold sa floor kag vault finals sa men’s artistic gymnastics sa Paris Games, nahibaluan nga bronze medalists man sanday Nesthy Petecio kag Aira Villegas nga lunsay halin sa Philippine boxing team.
