Nagpahanumdom ang Provincial Disaster Risk Reduction and Management Office (PDRRMO) sa publiko nga indi lang pag-isalig sa health sector kag sa otoridad ang pagtapna sa kaso sang dengue kundi dapat nga umpisahan gid sa sulod sang balay.
Sa interview sang Bombo Radyo kay retired police colonel Cornelio Salinas, head sang amo nga opisina, iya ginpahayag nga madugay na nakaplastar ang kampanya sang mga local government unit apang mismo ang mga pumuluyo ang dapat magtinguha man nga limpyuhan ang palibot agud malikawan ang pagpangitlog sang lamok.
Subong pa lang suno kay Salinas, dapat nga mangin agresibo ang publiko sa pagsunod sa 4S strategies antes maglala ang sitwasyon kag sang mga dengue patient ang mga ospital sa probinsya.
Ang 4S amo ang Search and Destroy, Secure Self-protection, Support Fogging and Spraying, kag Seek Early Consultation.
Ginpaathag man sini nga pananglitan may deklarasyon sang state of calamity, dapat dumdumon nga indi lang dengue ang ginapainan sang budget sang probinsya kundi ang mga palaabuton pa nga problema dala sang La Niña.
Nahibaluan nga ginatun-an na subong ang pagdeklarar sang dengue outbreak sa Iloilo. Ang Passi City nga amo ang may pinakamataas nga kaso sa probinsya ang una na nakadeklarar sang state of calamity.
