Ginpasalig sang Department of Agriculture (DA) nga indi ini maggamit ukon magbakal sang expired vaccines batok sa African swine fever (ASF).
Suno kay DA Assistant Secretary Arnel De Mesa, indi na paggamiton sang ahensya ang bakuna nga nag-abot sa Pilipinas halin sa Vietnam sang nagligad nga tuig bangud naabtan na ini sang expiration dates bangud man sa kalawigon sang proseso kag approval.
Pahayag pa ni De Mesa, bisan sa emergency purchase kag regular procurement, siguruhon anay sang ahensya nga may validity ini sa duha pa ka tuig.
Gin-isyu sang DA ini nga statement matapos nagpahayag ang Samahang Industriya ng Agrikultura (SINAG) nga basi gamiton ang 150,000 doses sang expired AVAC live vaccines.
Paathag ni De Mesa, ang batch sang vaccines nga ginatumod sang SINAG ang nag-abot na sa pungsod antes ang procurement kag antes maka-isyu ang Food and Drug Administration (FDA) sang certificate of product registration (CPR) para sa government-controlled vaccinations gamit ang ASF AVAC live vaccines.
Gin-athag sini nga sa subong, wala pa sang ginauyatan nga ASF vaccines ang ahensya.
Ginabanta nga 10,000 doses paagi sa DA emergency procurement ang magaabot sa masunod nga Biyernes para magamit sa outbreak sa Batangas.
Nahibaluan nga bilog nga probinsya na ang nadeklarar sa idalom sang state of calamity bangud sa ASF outbreak sa Calatagan, Lian, Lipa City, Lobo, Rosario, San Juan, Talisay, kag Tuy.
