Ginpaathag ni Tigbauan Mayor Virgilio Teruel nga nagakaubos na ang mga bulong kag dengue kits sa amo nga banwa rason nga nagdeklarar sila sang state of calamity.
Sa interview sang Bombo Radyo kay Teruel, iya ginpahayag nga kun regular procurement lamang, magalawig ang proseso kag madugayan sila sa pagbakal sang mga bulong kag indi matatapan ang nagadamo nga mga pasyente bangud sa dengue outbreak.
Nakasugtan suno sa alkalde ang deklarasyon sang state of calamity agud nga magamit ang Quick Response Fund sang Municipal Disaster Risk Reduction and Management Office para sa pagbakal sang bulong, larvicide, mosquito nets, kag iban pa gid nga kinahanglanon.
Ginmanduan man ni Teruel ang Rural Health Unit nga bantaon ang kinahanglanon nga bulong pati sa pag-abot sang La Niña phenomenon bangud pat-od nga magasaka pa ang kaso sa padayon nga pag-ulan-ulan.
Sa latest data halin sa Municipal Health Office, yara na sa 117 cases sang dengue ang na-rekord sa amo nga banwa halin sang Enero 1 tubtub sang Agusto 10 nga may 550% nga saka ipaanggid sa 18 gid lamang ka kaso sang nagligad nga tuig.
Gin-report man ang clustering sang kaso sa pito ka mga barangay nga amo ang Brgy. Baguingin, Brgy. Buyu-an, Brgy. Dorong-an, Brgy. Bitas, Brgy. 3 Poblacion, Brgy. 2 Poblacion, kag Brgy. Napnapan Norte.
Ang Tigbauan amo ang ikaduha nga local government unit sa probinsya nga nagdeklarar sang state of calamity kasunod man sang lihok sang Passi City nga amo ang pinakamataas sa numero sang kaso sa Iloilo Province.
