Nadugangan pa ang numero sang patay sa syudad sang Iloilo bangud sa dengue.
Sa report sang Iloilo City Health Office as of August 15, nakasaad nga ang 28-anyos nga babaye nga biktima ang residente sang Barangay Tacas, Jaro.
Sa interview sang Bombo Radyo kay Dr. Jan Reygine Ansino-Hortinela, medical Officer III sang Iloilo City Epidemiology and Surveillance Unit, iya ginpahayag nga nakasaad sa death certificate sang pasyente nga cardiogenic shock ang ginkamatay sini nga may severe dengue.
Natukiban man nga positibo sa coronavirus disease 2019 ang biktima sang ginpaidalom sa reverse transcription-polymerase chain reaction (RT-PCR) test.
Gina-check pa sang health office ang dugang nga impormasyon kaangot sa kamatayon sang amo nga babaye.
Ginpaathag pa sang natungdan nga ang severe dengue ang nagapakita na sang respiratory distress kun sa diin ginahapo na ang pasyente, kinahanglan na tubuhan, nagapalya na ang korason, kag naganubo ang blood pressure.
Sa subong, nagdangat na sa tatlo ang napatay sa syudad subong nga tuig bangud sa dengue.
Nahibaluan nga may 649 confirmed cases na sa Iloilo City apang wala pa gindeklarar ang outbreak bangud ini nga numero ang wala pa nakadangat sa epidemic threshold.
