Gin-athag ni Iloilo City Councilor Sedfrey Cabaluna nga wala ini nag-solicit sang suporta kay anay Iloilo City Mayor Jed Patrick Mabilog apang nagpahayag siya sang pagpasalamat nga nalakip siya sa prayers sang anay alkalde.
Reaksyon ini sang konsehal matapos nagguwa ang iya pangalan sa halangpon nga social media posts sang former mayor kaupod man sa mga pangalan nga “Sheen”, “Young”, “Jeck”, kag “Mandrie.”
Isa sa latest posts ni Mabilog ang nagsiling “Start this day YOUNG with a JECKSHOT and feel like a MANDRIEay even if it’s a nice SEDFREYday.”
May nagaguwa nga espekulasyon sa posible pagbalik sang anay alkalde kag posible nga mangin kaalyado sini ang ginapang-mensyonar nga mga pangalan.
Sa interview naman sang Bombo Radyo kay Cabaluna, iya ginpahayag nga ginatangla gid sini ang anay alkalde kun serbisyo publiko kag liderato ang pagahambalan, apang wala siya nagpangayo sang suporta halin diri. Posible suno kay Cabaluna nga nanotisyaran man ni Mabilog ang iya mga lihok bilang konsehal para sa ikaayo sang syudad.
“You know naman Mayor Jed Patrick Mabilog, he’s a person we look up to in the field of public service. Bal-an ta kun ano ang nangin kontribusyon niya sa pag-uswag sang syudad sang Iloilo. I believe wala man ko nag-solicit sang support sa iya. Siguro nakita ya man ang aton ginahimo para sa syudad and we are grateful for that. More importantly, wala man siya sang ginapangayo nga balik kundi ang padayon nga pag-dedikar sang aton nga masarangan sa pagbulig sa aton mga pumuluyo like he also did when he was a public official… Daku ini nga bagay kag gapasalamat kita sa aton anay mayor sa iya pagpabutyag sang suporta sa aton,” pahayag sini.
Suno pa sa natungdan, panalagsahon lang gid ang ila komunikasyon ni Mabilog kag limitado lamang ini sa panamyaw kaangay sa kaadlawan, pangamusta sa pamilya, apang “wala man gid” sang istorya sa pulitika.
Ginpahayag sang konsehal nga nakibot man siya nga yara na ang iya pangalan sa gindugang sang anay alkalde sa iya posts nga iya “gina-endorso”.
“In the past, he would send some prayers, post some prayers… tapos nakibot man ko recently gindugang ya kita sa mga ngalan nga ara sa iya ginapang-endorso and we’re thankful for that also,” pahayag sini.
Kun endorsement man ini ukon pangamuyo suno kay Cabaluna, nagpasalamat siya kay Mabilog kag nag-reply man ini sa konsehal nga padayunon lang ang pagtindog para sa husto.
“I believe it’s a prayer, and it should be treated as one. I pray for the same for the good mayor and for the city and hopefully we can work together in the future also — in one way or another — para sa padayon nga pag-uswag sang syudad,” pahayag pa ni Cabaluna.
(Photo: Cabaluna/FB); (Screengrab: Mabilog/FB)
