ILOILO CITY – Ginkalipay ni Iloilo City Councilor Johnny Young ang pagpakita sa iya sang suporta ni former Iloilo City Mayor Jed Patrick Mabilog sa 2025 elections.
Sa interview sang Bombo Radyo kay Young, iya ginpahayag nga madugay na sila nga mag-abyan ni Mabilog.
Nahibaluan suno kay Young nga magka-upod sila ni Mabilog nga nagpadalagan sang 2010 elections.
Gin-ako man sini nga masami man sila nga nagabayluhanay sang mensahe ni Mabilog, apang gin-athag sini nga wala sila naka-istorya natuhoy sa politika.
Kun may yara man sang post ang anay alkalde suno sa konsehal, maathag nga nagapakita lang ini sang suporta sa ila kag indi na dapat paghatagan pa sang anuman nga kahulugan.
Gin-athag man sang konsehal nga sa subong ang iya loyalty ang yara kay Mayor Jerry Treñas.
