Nag-deploy ang Thailand sang 300 ka military personnel agud magpangita sa siyam ka mga tawo nga missing matapos nagtibusok ang isa ka eroplano sa Bangkok, Thailand.
Duha ka Thai pilots, lima ka Chinese kag duha ka Thai nga pasahero ang sakay sa Cessna Caravan C208B turboprop plane kag ginapatihan nga lunsay nagkalamatay matapos ang insidente.
Halin ang aircraft sa main international airport sang Thailand 2:46 p.m. local time kag pakadto kuntani sa airport sa eastern Trat province suno sa Chachoengsao provincial office of the government’s public relations department.
Nadulaan ini sang kontak ginabanta 10 minutos matapos nga yara na ini sa kahawaan.
Nakit-an na sang otoridad nga naglalapta ang mga parte sang aircraft amo man ang halos 70 ka lapta-lapta nga parte sang lawas sang tawo nga gilayon man gindala sa ospital para ma-identify.
Nangin mabudlay man para sa rescuers ang search operations bangud magluwas nga naga-ulan, nagtibusok ang aircraft sa isa ka mangrove forest rason nga indi makahulag sang maayo ang mga personnel.
Natalana nga iga-analisa sang otoridad ang aircraft debris para mahibaluan ang rason sang plane crash.#
(Chachoengsao’s Public Relations Department/AP)
