Nakapauli na si anay Iloilo City Mayor Jed Patrick Mabilog sa Iloilo subong nga aga, Septyembre 20.
5:12 subong nga aga sang nag-abot ang former mayor paagi sa PR 2139 flight (Manila to Iloilo) sa Iloilo International Airport sa Cabatuan.
Nakit-an gid ang kalipay sa nawong sini samtang suksok ang pula nga polo shirt nga kabahin sang iya pagsaulog sang iya ika-59 nga kaadlawan subong mismo nga adlaw.
“It’s cloud nine,” pahayag sang former mayor sa exclusive interview sang Bombo Radyo samtang sakay ini sa eroplano kun sa diin on board man sa flight si Bombo Roger Gencianeo.
Kahapon, Septyembre 19, sa imbukada nga bahin sang ika-anum nga hearing sang quad committee ukon quad com sa Kamara, nagpungko bilang resource person si Mabilog.
Nagtalangison pa ini samtang naga-deliver sang malapit 20 ka minutos nga speech kun sa diin niya ginpanindugan nga indi siya drug protector.
Ginsaysay sang anay alkalde ang inagihan niya kag iya pamilya sang tion sang administrasyon ni anay Presidente Rodrigo Duterte kun sa diin nalakip siya sa “narco-list” tubtob nga napilitan sila nga magbiya padulong sa luwas sang pungsod para sa ila seguridad.
Suno sa anay alkalde, makaligad ang pito ka tuig nga yara ini sa Amerika kag nakapauli na sa Pilipinas, nahatagan siya sang kahigayunan nga tinluan ang iya pangalan.
Dugang sang alkalde, biktima siya sang garuk nga sistema sang hustisya sa Pilipinas. Ginapanawagan man sini nga mapasabat sa layi ang sin-o man nga nagaabusar sa poder.
Nagalaum naman ini nga indi na maeksperyensiyahan sang iban ang iya inagihan nga “pag-antos, persekyusyon kag trauma.”
SEGURIDAD
Nakahanda naman ang security plan sang Police Regional Office (PRO) 6 kadungan sang pagbalik ni Mabilog.
Suno kay PRO 6 Director Police Brigadier General Jack Wanky, nakahatag na ini sang instructions kay PCOL Kim Legada, Director sang Iloilo City Police Office, nga amo ang magapanguna sa paghatag sang seguridad sa former mayor.
