Ginpa-Bombo sang isa ka driver ang problema sa dalan sa Tabuc Suba, Jaro, Iloilo City bangud sa drainage project nga ginaalegar napabay-an sa sulod sang pila na ka semana.
Sa interview sang Bombo Radyo kay Rene Soliguen, iya ginpahayag nga duha tubtub tatlo ka semana na ang ila ginaantos nga nagapug-ok ang trapiko sa amo nga lugar bangud wala pa natapos ang proyekto.
Daku ang epekto sini sa ila palangitan-an suno sa tag-reklamo bangud sa baylo nga lima ka beses sila magbalik-balik, tatlo na lang ang iya trips bangud sa kadugayon sang dalagan sang mga salakyan.
Suno kay Soliguen, bangud wala pa natapos ang drainage project, isa lang ka lane ang ila maagyan.
Pahayag sini, magluwas nga huol sa trapiko, may buho man nga wala natakluban nga delikado para sa iban nga mga motorista ilabi na kun gab-i bangud wala man sang ginbilin nga early warning device.
Ginsiling sini nga “ginpabay-an” ang proyekto bangud wala man sila sang nakit-an nga naga-obra.
Bukas ang Bombo Radyo sa sabat sang kontraktor ukon sang mga ahensya nga involved sa proyekto para masolbar na ang problema nga nagatuga-huol sa palangabuhian sang mga driver kag iban pa.
