ILOILO CITY – Ginlaslasan sang mag-asawa nga former Iloilo City Mayor Jed Patrick Mabilog kag former First Lady Ma. Victoria ‘Marivic’ Mabilog ang Uswag Ilonggo Party-list.
Una nga ginbulgar ni former Mayor Mabilog nga ang Uswag Ilonggo amo ang sa likod sang pagpahilabot sa Team Gugma ni Iloilo City Lone District Rep. Julienne ‘Jamjam’ Baronda kag Team Uswag ni Iloilo City Mayor Jerry Treñas.
Sa post ni Mabilog, iya gintumod ang Uswag Ilonggo nga amo ang nagalabugay sa politika sa syudad.
Apisar wala man ginpangalanan, isa man lang ang nagatiglawas sa Uswag Ilonggo kag indi amo si Rep. James ‘Jojo’ Ang.
Ini suno sa alkalde ang rason kun ngaa nagaresulta sa indi maayo ang relasyon sang mga politiko.
Ginsaway man ni Mabilog ang Uswag Ilonggo nga magpahimunong.
“Haiist, si Uswag Ilonggo bi ang ga labugay sang tanan, naga pa-it pa gid. Abi magpahimumong!”
Nahibaluan nga si Mabilog ang ginabati-bati nga mapadalagan bilang Mayor kag ang iya abyan naman nga si Iloilo City Lone District Rep. Julienne ‘Jam Jam’ Baronda ang mapare-elect bilang kongresista.
Samtang, ginkampanya man ni Mrs. Mabilog nga indi na pagbotohon pa sa masunod nga eleksyon ang Uswag Ilonggo Party-list.
“No More to Uswag Ilonggo Party-list.”
