Kumpirmado na nga ginpili ni President Ferdinand Marcos, Jr. ang long-time governor sang Cavite nga si Juanito Victor “Jonvic” Remulla Jr. agud magpamuno sa Department of the Interior and Local Government (DILG).
9:00 buwas sa aga magasumpa si Remulla sa Malacañang agud pormal nga magpungko sa posisyon nga nangin bakante sang nagpadalagan sa pagkasenador si anay DILG Sec. Benhur Abalos.
Si Remulla naman ang eligible pa kuntani sa isa pa ka termino sa pagka-gobernador apang subong nga Lunes, gin-withdraw na sini ang iya gin-file nga certificate of candidacy (COC) sa Commission on Elections (Comelec).
Ang iya utod nga si Justice Secretary Jesus Crispin “Boying” Remulla ang nagkumpirma man nga na-appoint ang iya manghod bilang DILG secretary.
Ang appointment kay Jonvic amo ang una nga tion sa recent history sang Malacañang nga may mag-utod nga dungan nga magapungko sa Gabinete.
Natabo man ini anay sa administrasyon ni anay Presidente Benigno Aquino III apang amay kag bata ang nagpungko nga Cabinet members nga amo sanday budget secretary Butch Abad kag Presidential Management Staff secretary Julia Abad.
Sa pulitika, nangin provincial legislator, acting governor, vice governor, kag governor si Jonvic sa Cavite.
Ang DILG appointment amo ang iya una nga national position. Ini amo ang may supervision sa pila ka mga ahensya kag bureau kaangay sang Philippine National Police amo man sa mga local government units sa bug-os nga Pilipinas.
