Apat na lamang ka mahina nga guerilla fronts sang New People’s Army (NPA) ang ginatutukan subong sang militar.
Suno kay Armed Forces of the Philippines (AFP) chief General Romeo Brawer Jr., target nila nga mapapas ini nga mga grupo sa pagtakop sang tuig.
Tatlo ka bulan ang nagligad, pito pa ang nabilin nga guerilla fronts apang suno kay Brawner, antes magtapos ang 2024, nagalaum sila nga maubos na ini tanan nga mga grupo sang rebelde.
Ini nga apat ka fronts ang naga-operate sa Northern Luzon, Southern Luzon, kag Visayas areas.
Suno pa kay Brawner, daku ang ginbuhin sa pwersa sang NPA bangud halin sa 2,200 fighters sang nagligad nga tuig, nahimo na lamang ini nga 1,111 subong.
Sa armas naman, yara man sa 1,000 ang nabuhin sa sini nga period suno sa militar.
Sang Oktubre, matandaan nga gin-report sang National Security Council (NSC) nga ang alleged acting chairperson sang Communist Party of the Philippines (CPP) nga si Wigberto “Baylon” Villarico ang nadakpan na sa Quezon City.
Nag-demand ang CPP nga i-release na gilayon si Villarico nga identified nga peace consultant sang National Democratic Front of the Philippines (NDFP) nga political wing sang communist organization.
Ginsiling naman ni National Security Adviser (NSA) Eduardo Año nga si Villarico amo ang nagbulos sa liderato sa CPP matapos nga napatay si Benito Tiamzon sang Agusto 22, 2022. Si Villarico man ang ginatudlo nga katapusan nga komunista nga lider nga at large nga may ikasarang nga magpanguna sa party kag sa armed wing sini nga NPA.
