May isa ka lalaki sa Argentina nga makakaluluoy gid ang naabtan bangud lamang sa iya pagdala sang pulbos.
Ini amo si Maximiliano Acosta nga nagasakay sa isa ka bus sang nagsulod ang mga pulis para sa isa ka routine check.
Ginpanglantaw pati ang baggage sang mga pasahero kag nadugayan gid ang mga pulis sa bag ni Maximiliano bangud sa 18 ka containers sang pulbos.
Pila ka beses nga nagpaathag ang lalaki nga powder lang ang sulod sini kag personal niya ini nga gamiton kag nagaplano man siya nga i-resell ini sa Buenos Aires para nga makadugang sa income.
Indi kumbinsido ang mga pulis kag nagduda nga iligal ini nga droga.
Gindala sa detention si Maxi kag ang makakilibot pa gid, ginsulod siya sa presuhan matapos gin-alegar nga napamatud-an sa test nga puno sang cocaine ang 18 ka containers. Wala man ginpahibalo ang pamilya ni Maxi kun ano ang natabo sa iya.
Bangud gin-anunsyo sang otoridad nga duha ka kilo kag 444 grams sang cocaine ang dala ni Maxi kag nakumpiskar nila sa bus operation, madamo ang nagdayaw sa mga pulis kag pati ang Minister of Security sang Argentina ang nag-share man sini nga balita sa social media.
Bangud sa padayon nga protesta ni Maxi, ginpaidalom sa lain pa gid nga laboratory testing ang white powder apang bangud madugay ang resulta, ginpabilin siya sa sulod sang presuhan kaupod ang mga criminal.
21 ka adlaw pa ang ginlawig antes napamatud-an sa ikaduha nga resulta nga plain gid lamang nga pulbos ang unod sang container rason nga gin-release si Maxi sa presuhan.
Sa baylo nga sorry ang iya mabaton, ginpamato-mato pa siya papauli kag nag-ayo lang siya sa mga motorista kun pwede siya pasakyon.
Nagrason naman ang Minister of Security nga masami gid man masal-an ang talcum powder nga cocaine gani nga nagpanigurado lamang ang security forces.
