Umpisahan na sang Commission on Elections (Comelec) subong nga adlaw, Enero 6, ang pag-imprinta sang 73-million ka mga balota nga gamiton para sa midterm elections kag sa una nga parliamentary polls sa Bangsamoro Autonomous Region in Muslim Mindanao (BARMM).
Suno kay Comelec Chairman George Garcia, magalawig sang 77 ka adlaw ang printing ukon karon sa hapon tubtub sa Abril 14.
Target sang poll body nga at least 800,000 tubtub sa 900,000 ukon one million ang ma-print sa kada adlaw umpisa subong.
May prayoridad man ang opisina sa ila iga-print — halimbawa, ang para sa 11,000 overseas voters sa mga pungsod nga wala ginatugutan sa internet voting, amo man ang mga balota para sa BARMM parliamentary elections.
Ginpahayag ni Garcia nga sundon nila ang ila schedule sa pag-print sang balota bisan nga may pending appeals nga gin-file ang pila ka disqualified candidates sa Korte Suprema.
Paathag sang natungdan, wala man sila nagdalok sang due process sa may pending disqualification cases gani indi nila mapunggan ang Comelec nga maghulag santo sa scheduled election activities magluwas lamang kun may mandu ang Supreme Court.
Dugang pa ni Garcia, nakumpleto naman nila ang Election Management System nga naga-unod sang pinal nga lista sang mga kandidato nga magapasakop sa eleksyon.
